Programming Language ကျွမ်းကျင်စွာ လေ့လာရန် အဆင့် ၆ ဆင့်

နည်းပညာကို စိတ်ဝင်စားတဲ့လူတစ်ယောက်ရဲ့ စိတ်ထဲမှာ ယေဘုယျအားဖြင့် တွေးမိလေ့ရှိတဲ့မေးခွန်းကတော့ " Programming ဘာသာစကားကို ဘယ်လိုလေ့လာသင်ယူရမလဲ" ဆိုတဲ့မေးခွန်းပဲ ဖြစ်ပါတယ်။ အထူးသဖြင့် ကျောင်းသား လူငယ်တွေဟာ Programming Language ကိုလေ့လာဖို့အတွက် သင့်တော်တဲ့လမ်းကြောင်းရှာရန် အ​ခက်တွေ့ တတ်​​ကြပါတယ်။ သူတို့တွေဟာ Programming Language ကို ​​မြန်မြန်ဆန်ဆန်နှင့် ကြိုးကြိုးစားစား လေ့လာကြပေမဲ့ အခြေခံသဘောတရားများတွင်သာ လည်ပတ်နေပြီး နောက်တဆင့်မတက်နိုင် ဖြစ်နေတတ်ပါတယ်။

အချို့ဆိုရင် အခြေခံများကိုအာရုံမစိုက်ဘဲ အဆင့်မြင့်တဲ့အပိုင်းကို တိုက်ရိုက်သွားတတ်ကြပါတယ်။ ​ဒီလိုမျိုးအမှားတွေကြောင့် Programming ကျွမ်းကျင်လာဖို့ အချိန်ကြာသွားတတ်ပါတယ်။ ကိုယ့်ရဲ့ Programming စွမ်းရည်ကို မြှင့်တင်ရန် သင့်တော်သောလမ်းကြောင်းအတိုင်း လိုက်နာဖို့လိုအပ်ပါတယ်။ Programming ဘာသာစကား ကျွမ်းကျင်လေ့လာရန် လိုက်နာရမည့် အဆင့်တွေကို အောက်မှာ ဖော်ပြထားပါတယ်။

1. မိမိ လေ့လာကျွမ်းကျင်လိုသော Programming Language ကို ရွေးချယ်ခြင်း
2. အခြေခံကို ပိုင်ပိုင်နိုင်နိုင် လေ့လာခြင်း
3. အခြေခံမှ အဆင့်မြင့်အပိုင်းကို စတင်လေ့လာခြင်း
4. ထပ်တလဲလဲ လေ့ကျင့်မှုများ ပြုလုပ်ခြင်း
5. ​ပြဿာနာ​တွေ ဖြေရှင်းခြင်း နှင့် Project များ ဖန်တီးခြင်း
6. အခြားသူ​​တွေနှင့် မိမိတတ်ထားသော ပညာများကို အပြန်အလှန် မျှဝေခြင်း တို့ပဲဖြစ်ပါတယ်။

(၁) မိမိကျွမ်းကျင်လိုသော Programming ဘာသာစကားကို ရွေးချယ်ခြင်း

ပထမဦးဆုံးအနေနဲ့ လူကြိုက်များသော ပရိုဂရမ်ဘာသာစကားများဖြစ်တဲ့ Python, C, C++, Java, JavaScript, PHP, HTML, CSS, Ruby အစရှိသည်တို့ထဲမှ မိမိလေ့လာကျမ်းကျင်လိုသော Programming ဘာသာစကားကို ​​​ရွေးချယ်တတ်ရန် လိုအပ်ပါတယ်။ ဥပမာအားဖြင့် Web Development အတွက် JavaScript၊ PHP စသည်တို့ကိုရွေးချယ်နိုင်ပါတယ်။ AI နှင့် ML အတွက် Python က အသင့်တော်ဆုံးဖြစ်ပါတယ်။ အကယ်၍ အခုမှ စလေ့လာမည်ဆိုပါက C သို့မဟုတ် C++ ဖြင့်စတင်ရန် အကြံပြုလိုပါတယ်။ ဘာကြောင့်လဲဆို​တော့ ၎င်းတို့အားဖြင့် ပရိုဂရမ်မင်းကို အခြေခံကျကျ နားလည်ဖို့အတွက် အကောင်းဆုံးဖြစ်ပါတယ်။

(၂) အခြေခံကို ပိုင်ပိုင်နိုင်နိုင် လေ့လာခြင်း

အထူးသဖြင့် ဘာသာစကား၏ အခြေခံအင်္ဂါရပ်များဖြစ်တဲ့ Syntax၊ Data Types၊ Variables၊ Text Editors စသည်တို့ကို စေ့စေ့စပ်စပ်လေ့လာထားဖို့ လိုအပ်ပါတယ်။ ဒီအရာတွေက ​ Programming ဘာသာစကားတစ်ခုလုံး၏ အရေး​​ကြီး​သော​အခြေခံအုတ်မြစ်လည်း ဖြစ်ပါတယ်။ YouTube ဗီဒီယိုများ၊ Blog များမှာ လေ့လာနိုင်ပါတယ်။

(၃) အခြေခံမှ အဆင့်မြင့်ပိုင်းကို စတင်လေ့လာ​​​ခြင်း

ပိုမိုနက်ရှိုင်းသော Programming သဘောတရားများြဖစ်သည့် Pointers, Dynamic Memory Allocation, File Management & Preprocessors များကိုလည်း လေ့လာထားရပါမယ်။ C Language သို့မဟုတ် OOP Concept များတွင် ပါဝင်သည့် Interface နှင့် Package, Multithreading စသည်တို့ကို သေသေချာချာလေ့လာရန်လိုအပ်​ပါတယ်။ JAVA မှာလည်း ထိုနည်းတူပါပဲ။ ပိုမိုကျွမ်းကျင်ရန်အတွက် Linked List, Stack, Queue, Heap စသည့် Data Structures များနှင့် Algorithms တို့ကိုလည်း ပိုင်နေအောင်လေ့လာဖို့ လိုအပ်ပါတယ်။ GeeksforGeeks, TutorialPoint, Udemy စသည့်အမျိုးမျိုးသော အွန်လိုင်းပလက်ဖောင်းများတွင် ဤအကြောင်းအရာများအားလုံးကို ပြည့်စုံစွာလေ့လာလို့ရပါတယ်။

(၄) ထပ်တလဲလဲ လေ့ကျင့်ခြင်း

"လေ့ကျင့်မှုရှိခြင်းသည် လူတစ်ယောက်ကို ပိုမိုပြည့်စုံစေသည်" ဟု ဆိုရိုးရှိသည့်အတိုင်း Programming Language ကိုတတ်နိုင်သမျှ လေ့ကျင့်ရန်လိုအပ်ပါတယ်။ မိမိ၏ လက်များကိုညစ်ပတ်​​​ညောင်း​နေပါ​စေ လက်တွေ့ကျသော ထိတွေ့မှုမျိုးနှင့်​​ လေကျင့်မှုရမှသာ သင်၏ Programming သဘောတရားများကို ပိုမိုခိုင်မာစွာနားလည်စေပြီး သင်လိုအပ်သောယုံကြည်မှုကိုလည်း ရရှိ​စေမှာ​​​ ဖြစ်ပါတယ်။ Programming ကို လေ့ကျင့်ရန်နည်းလမ်းများစွာရှိပါတယ်။ ဥပမာအားဖြင့် အမျိုးမျိုးသော Coding Challenge များနှင့် ပြိုင်ပွဲများတွင် ပါဝင်ခြင်းဖြင့် လေ့ကျင့်နိုင်ပါတယ်။ HackerRank, CodeChef, TopCoder စသည့် ပလက်ဖောင်းများတွင်လည်း လေ့ကျင့်လို့ရပါတယ်။

(၅) ပြဿာနာတွေ ဖြေရှင်းခြင်း နှင့် Project များ ဖန်တီးခြင်း

လုံလောက်တဲ့ လေ့ကျင့်မှုတွေ ပြုလုပ်ပြီးတဲ့အခါ မိမိကိုယ်တိုင် Project တွေ ဖန်တီးရပါမယ်။ မိမိကိုယ်တိုင် Project များကို ဖန်တီးခြင်းက ကိုယ့်ရဲ့ Programming Skill ကို အမှန်တကယ် တိုးတက်စေမှာ ဖြစ်ပါတယ်။ အမျိုးမျိုးသော Minor နှင့် Major Project တွေ ဖန်တီးတဲ့အခါ မိမိလိုအပ်ချက်နှင့် ကိုက်ညီမယ့် Programming language ကို ရွေးချယ်ပါ။ တန်ဖိုးရှိပြီးဆန်းသစ်တဲ့ Project တစ်ခုဖန်တီးဖို့အတွက်ဆိုရင် အကောင်းဆုံးနည်းဗျူဟာက ဒီဂျစ်တယ်နည်းကျကျဖြေရှင်းရန်လိုအပ်တဲ့ ပြဿာနာတစ်ခု (သို့မဟုတ်)အ​​ကြောင်းအရာကို ဦးစွာစဉ်းစားရပါမယ်။ ပြဿာနာ တစ်ခုကိုဖြေရှင်းရန် (သို့မဟုတ်) Project တစ်ခုတည်ဆောက်ရန်လိုအပ်​​​တဲ့​ အဆင့်များကို အောက်တွင်ဖော်​ပြ​​ထားပါတယ်။

1. ပြဿာနာတစ်ခုကို တိတိကျကျ ဖော်ထုတ်ခြင်း
2. ပြဿာနာကို နားလည်သဘောပေါက်ခြင်း
3. ဖြစ်နိုင်တဲ့ ဖြေရှင်းချက်အားလုံးကို စာရင်းပြုစုခြင်း
4. ဖြစ်နိုင်တဲ့ ဖြေရှင်းချက် အားလုံးကို အကဲဖြတ်ခြင်း
5. အကောင်းဆုံးဖြစ်နိုင်သော ဖြေရှင်းနည်းကို ရွေးချယ်ခြင်း
6. ရွေးချယ်ထားသော ဖြေရှင်းနည်းကို ပုံစံထုတ် ရေးခြင်း
7. Algorithm ရေးခြင်း
8. Pseudo - code ရေးခြင်း
9. Main Program ရေးခြင်း
10. ရေးထားသော Program များကို စစ်ဆေးခြင်း
11. ဖြစ်နိုင်တဲ့ Error များအားလုံးကို စစ်ဆေးပြီး ဖယ်ရှားခြင်း
12. နောက်ဆုံးတွေ ထိုပြဿာနာအတွက် ပြည့်​စုံတဲ့ဖြေရှင်းချက်တစ်ခု ရရှိပါလိမ့်မယ်။

(၆) အခြားသူတွေနှင့် မိမိတတ်ထားသော ပညာတွေကို အပြန်အလှန် မျှဝေခြင်း

နောက်ဆုံးအနေဖြင့် မိမိလေ့လာထားတဲ့ ပညာရပ်တွေကို အခြားသူတွေကို ပြန်လည်ဝေမျှပါ။ အခြားသူများကို တစ်စုံတစ်ရာ သင်ကြားပေးတော့မည်ဆိုရင် ကောင်းကောင်း ကြိုတင်ပြင်ဆင်ပြီး အခြားသူများ သံသယမဖြစ်စေရန် နက်နက်နဲနဲကြိုးစား သင်ကြားပေးပါ။ Open Source Project များ၊ Blog များ၊ လူထုဆွေးနွေးပွဲများတွင် ဝေမျှနိုင်ပါတယ်။ Dev.to, Daily.dev, Medium၊ Youtude အစရှိတဲ့ အွန်လိုင်းပလက်ဖောင်းများမှာလည်း အခြားသူတွေနဲ့ ဆက်သွယ် ဆွေးနွေးနိုင်ပါတယ်။